5 Kino Chur 13 Kino Chur 5 CDC
 «Zäma»
Bild/Illu/Video: Sandra Peters

«Zäma»

Allna andera gahts guat, nu diar gahts schlecht.

Jeda kriegt meh vom Kuacha, es isch so ungerecht.

Si hend Glück in dr Liabi und sogar Glück im Spiil.
Du hesch zerplatzti Tröim und sus nid viil.

Ma erntet, was ma säät, doch nid in dem Läba.

Di andera am Meer, du im strömenda Räga.
Du krüpplisch Tag und Nacht – wirsch nu überganga.

Du fühlsch di in dera Firma und dem Job gfanga.

Hart z begriifa, aber es isch zum Verzwiifla.
So schnell körsch hüt zum alta Iisa.

Schwierig was z ändera, wil d Hypothek koschtet.
Und etz hed sich d Frau au no a Hund poschtet.

Du weisch genau, wär d Schuld isch an dinera Situation.

Dia us dr Fremdi druckend uf din Lohn.

Du dörf ja nüt meh säga, sus bisch grad en Rassischt.
I säg, kum mal klar mit diar sälber und dem wo du bisch.


Lahn üs teila – es hed für alli knuagg.
Lahn üs heila – miar sind usem gliicha Bluat.
Lahn üs liaba – weisch wia guat das tuad.

Lahn üs das apacka – zäma kunnds richtig guat.


Hör uf jommera, ir Schwiiz muass niamert verhungera.
Doch uf Facebook stellend sich viili so tumm ah.
Hend z Gfühl si kemmend in jedera Situation z kurz.
D Gfühl vo da andera sind na derbi schnurz.
Solidarität blitzt nu so kurz uf wia a Sternschnuppa.

Hend si au alles wichtiga, redend si nu vo Lugga.

Wär ir Demokratie schloft, verwacht mit Bolsonaro und Trump.
Lahns üs gar nid erscht so wiit ko, gib mr dini Hand.  

Wär schön, wenn miar zäma ina Zuakunft gönnd,  
wo ma zäma schafft und sich d Menscha verstönnd.
Nid dina Bsitz, nei dini Tata spendend Freud.

I heissa jeda willkomma und hans nia bereut.
Denn unterschiedlichi Kultura, bringend Farb ins Spiil.
Es isch Ziit ufzwacha, miar sind no lang nid am Ziil.  

Halb so schlimm, wenn das Schoggiküss statt Mohraköpf sind.
Versuach mal z überlegga, villicht gahts denn in din Grind.  


Lahn üs teila – es hed für alli knuagg.
Lahn üs heila – miar sind usem gliicha Bluat.
Lahn üs liaba – weisch wia guat das tuad.

Lahn üs das apacka – zäma kunnds richtig guat.

Themenverwandte Artikel

«Schwimmer»
Bild/Illu/Video: Christian Imhof

«Schwimmer»

«Wunderschön»
Bild/Illu/Video: Sandra Peters

«Wunderschön»

«Buuchgfühl»
Bild/Illu/Video: Christian Imhof

«Buuchgfühl»

Empfohlene Artikel