«Zwei Siita»
Bild/Illu/Video: Sandra Peters

«Zwei Siita»

Ima Asylzentrum irgendwo ir Schwiiz

I han schlecht gschlofa ir Nacht, wia i’s scho länger so mach.
Wenns dunkel wird, holend mi dia Bilder ih. I fühl mi so schwach.

D Gsichter vor Flucht verfolgend mi, i kriag kai Aug meh zua.

Au wenn etz in Sicherhait bi, findi dah kai Ruah.

Si hend gseit, das sig z Paradies, doch alles isch so fremd.

Egal wo i hera gah, es hed niamert wo i kenn.

Si redend mit miar, doch i verstahn d Hälfti nid.

Zu tüüf sitzt no dr Schock, wil du bisch nid mit.

Was willi mit dem Handy? – i han niamert meh zum Reda.
I versuacha zrugg zur Normalität z finda und eifach z’überläba.
So gära würdi Gäld verdiana und dena Lüt dah öpis zrugg geh.
Doch i dörf ina nid danka für d Freiheit und no viil meh.  
Wil als Flüchtling dörfsch nid schaffa, das hend si im System.

Doch i werda alles tua zum bliiba und machs mr nid bequem.

Au wenn mi z Heiweh plogt, döt werdi sofort erschossa.

Es tuad miar im Härza weh, wia viil Bluat wäg dem Kriag scho isch gflossa.


Am Stammtisch irgendwo ir Schwiiz

I han schlecht gschlofa ir Nacht, wia i’s scho länger so mach.
Sit miar dia Grenza offa lönnd, gaht das Land dr Bach ab.

Si kömmend ina, übernachtend nu in Hotelzimmer.
Nämmend Gäld doch vo Schaffa hends kai Schimmer.
Si zerstörend üses Paradies, wil si immer meh wennd.
Egal wo d hera luagsch, si nämmend no üses letschta Hemd.
Dah kasch no lang säga si söllend büeza, für das sind dia sich z guat.

Kunnsch pensioniart, hesch kai Geld. Verstahsch mini Wuat?
Dia fuula Säck hend es Iphone. I kann mr nu a Samsung leischta.

Luagend tumm üsa Töchtera nah, das nervt mi am meischta.

Das fuula Pack macht dah Wellnessferia, läbt wia im Schlaraffaland.
Während miar krüpplend Tag und Nacht. Scho no interessant,

wia ma sich dia ganza Kleider leischta kann, wenn ma gar nüt hed.
Aber ja dr Staat zahlt ja scho, wemma am richtiga Ort jommeret.

Am beschta alli uswiisa, wil d Schwiiz kört da Eidgenossa.
Wär sich widersetzt und tumm tuad, wird direkt erschossa.

Themenverwandte Artikel

«Schwimmer»
Bild/Illu/Video: Christian Imhof

«Schwimmer»

«Witter schaffa»
Bild/Illu/Video: Marcus Duff / cascadas

«Witter schaffa»

Empfohlene Artikel