«Flugmodus»
Bild/Illu/Video: Christian Imhof

«Flugmodus»

I wett ar Strandbar was feins go bstella.

Doch i sitz dahai uf dr Couch am Tümmli dräha.
I wett diar dr Rugga mit Sunnacreme iriiba.

Drbi schiaba dah dahai fascht no Krisa.

I wünscha miar a Sprung ins isskalta Nass.

Doch dia Rächniga ufem Tisch verderbend jeda Spass.

I will wäg vo da, in d Wärmi und an Strand.
Mis Fernweh raubt mr bald no min Verstand.


Z letschta Mal Karibik isch scho so lang här.

I schlüssa d Auga und träuma mi ans Meer.  


I schalt in Flugmodus, will dr Wäg isch z Ziil.
Es git so viili schöni Ort wo i no gseh will.

I mim Pass heds no so viili lääri Siita dri.

I muass etz eifach wäg, egal wohi.


Statt neui Qultura kenna z lerna,

muassi luaga, dassi nid grad ipenna.

Statt Hand und Hand mit diar am Strand,

gsehni mini Träum zerplatza dah am Flüssband.

Statt am gnüssa vo Coco Loco und Piña Coloada,

gsehts dahai us als hätti a Bomba igschlaga.

Es heisst, ma müass no es bizli Geduld ha.
Doch i will nu eis, ab ufa Flughafa.


Z letschta Mal Karibik isch scho so lang här.

I schlüssa d Auga und träuma mi ans Meer.  


I schalt in Flugmodus. Ab hüt kasch mi vergässa.
Dr Stress und z Gschäft stossend grad nu uf Desinteressa.
I schalt in Flugmodus. Z Läba isch schön offline.
I gahn mit mim Schatz an Strand und gnüss Qualitytime.

Themenverwandte Artikel

«Schwimmer»
Bild/Illu/Video: Christian Imhof

«Schwimmer»

«Qultur für mi»
Bild/Illu/Video: Christian Imhof

«Qultur für mi»

Empfohlene Artikel